Archives

pokruszyć (sie) – pokruszyć (pol.)   Kaj żeś to trzimoł te pierniki, we kapsie, żeś ich tak pokruszōł? Wejź zaniyś trocha szupōw kurōm, yno ich pokrusz, co jedna niy zażere wszystkiego.  

pokryć (sie) – pochować, poukrywać (pol.)   Pokryła żech wszystki maszkety przed chłopym, coby za fest niy szkłōdziōł. Zaczło tak loć, że mysieli my sie wartko pokryć pod dachym.  

pokudłaczyć (sie) – pomierzwić włosy (pol.)   Jo ida do fryzjerki dziepiyro rano, cobych se w nocy niy pokudłaczyła tych włosōw. Niy chytej mi tych włosōw, bo mi ich pokudłaczysz. Co żeś to robiōł, żeś tak pokudłaczōł te włosy?      

pokudlić (sie) – pociągnąć za włosy (pol.)   Jeszcze roz jōm pokudlisz, to jo se z tobōm pogodom. Dej pozōr, bo teraz cie moga trocha pokudlić tym grzebiyniym. Możesz jōm czosać, yno dej pozōr, co jōm za fest niy pokudlisz.

połechtać (sie) – połaskotać (pol.)   Jeszcze roz mie połechcesz, to dostaniesz w łeb. Kery mie to tam połechtoł pod tym stołym? Mōm jo cie połechtać?      

polecieć – pobiec; pofrunąć (pol.)   Doczkej, synek już polecioł do budki po cygarety, zaroz ci prziniesie. Jo poleca do starki a pożycza trocha cukru. Jutro kupiymy, a wrōcymy starce. Jutro polecisz rano do piekarza, a prziniesiesz świyże żymły. Na bezrok polecymy fligrym do Ameryki. Boczōnie poleciały już do ciepłych krajōw.  

polepić (sie) – pokleić (pol.)   Polepiōł żech ta połōmano szufloda, ale terazki trza doczkać, aż uschnie. Kery sam polepiōł te abcybildry na te ôkno? Sam mosz kartka, tōż sam se możesz polepić te swoji ôbrozki.  

polić (sie) – palić (pol.)   Piyrwej polyli my liści na zegrōdce, a terazki skuli smoga trza wszystko wywozić. Jo wszystki papiōry z banku a ze urzyndōw pola w pywnicy, a niy wyciepuja ich. Cōz to zaś tam polisz, że tak śmierdzi?  

polizać (sie) – polizać (pol.)   Dej, se poliża kōnsek tego twojigo loda. Pies ci polizoł ta graczka, a ty sie terazki niōm bawisz. Kej żeś polizała tyn bōmbōn , tōż se go zjydz.    

poloć (sie) – polać (pol.)   Polyj tam Zigusiowi, bo mo prōzny keliszek. Dej pozōr, co sie niy polejesz tōm zupōm. Niy zapōmnij poloć tego betōnga, bo tam je fest hyc.